မြစ်ဆုံစီမံကိန်းအပြီးတိုင်ဖျက်သိမ်းရေး နိုင်ငံလုံးဆိုင်ရာလှုပ်ရှားမှုနှင့်ပတ်သက်၍ ဒို့မြေကွန်ရက်၏သဘောထား

မြစ်ဆုံစီမံကိန်းအပြီးတိုင်ဖျက်သိမ်းရေး နိုင်ငံလုံးဆိုင်ရာလှုပ်ရှားမှုနှင့်ပတ်သက်၍
ဒို့မြေကွန်ရက်၏သဘောထား

၂၀၁၉-ခုနှစ်၊ ဧပြီလ(၁)ရက်

မြန်မာနိုင်ငံအတွင်းတည်ဆောက်ပြီးစီးခဲ့သော ရေကာတာစီမံကိန်းများအားလုံးသည် ပြောသလိုမလုပ်၊ ပြောသလိုမဖြစ်ဘဲ အများပြည်သူများထိခိုက်နစ်နာသောစီမံကိန်းများဖြစ်ကြောင်း သက်သေအမြောက် အမြားရှိခဲ့ပြီးဖြစ်သည်။ ထိုစီမံကိန်းများကြောင့် လူပေါင်းများစွာတွင်ဖြစ်ပေါ်လာသော ဘဝထိခိုက်ပျက်စီးမှု များကိုဖြေရှင်းခြင်းမရှိဘဲ စီမံကိန်းအသစ်များကိုသာ ဦးစားပေးလိုက်လံဆောင်ရွက်စီစဉ်နေမှုများကို ကန့်ကွက်သည်။

ဧရာဝတီမြစ်သည် မြန်မာနိုင်ငံ၏အသက်သွေးကြောဖြစ်သည်။ နိုင်ငံ၏သမိုင်းအမွေအနှစ်ဖြစ်သည်။ မြစ်ဆုံ၊ ဧရာဝတီမြစ်နှင့် မြစ်ဝှမ်းဒေသများ၏ သဘာဝဂုဏ်သတ္တိတန်ဖိုးများကို ယွမ်ငွေ၊ ဒေါ်လာနှင့် ကျပ်ငွေများဖြင့် ရောင်းဈေးတွက်ချက်စဉ်းစားသည့် အတွေးအခေါ်လုပ်ရပ်မှန်သမျှကို ဆန့်ကျင်ကန့်ကွက်သည်။

မြစ်ဆုံ၊ ဧရာဝတီမြစ်နှင့် မြစ်ဝှမ်းဒေသများမှ လူ့ယဉ်ကျေးမှု၊ လူမှုဘဝဖြစ်တည်ထွန်းကားမှု၊ သမိုင်းတန်ဖိုး များကို လျှပ်စစ်မီဂါဝပ်ဖြင့် တွက်ချက်ရောင်းစားမည့် အတွေးအခေါ်လုပ်ရပ်များသည် ဒေသတွင်း နေထိုင်သည့် တိုင်းရင်းသားလူမျိုးများအပေါ် အသိအမှတ်မပြု၊ နှိမ့်ချစော်ကားခြင်းဖြစ်ပြီး လူမျိုးပေါင်းစုံ နေထိုင်သော မြန်မာနိုင်ငံအတွင်းတွင် ပိုမိုသွေးကွဲမှုများ ဖြစ်ပွားစေရန် တွန်းအားပေးဖော်ဆောင်ခြင်းလည်း ဖြစ်သည်။

မြစ်ဆုံ၊ ဧရာဝတီမြစ်နှင့် မြစ်ဝှမ်းဒေသများမှ လူမှုအဖွဲ့အစည်းများအားလုံး၏ အနာဂတ်နှင့်တန်ဖိုးကို (၅)နှစ် တစ်ကြိမ်သာသက်တမ်းရှိသော အစိုးရလူတစ်စုမှ ဆုံးဖြတ်ပိုင်ခွင့်မရှိကြောင်း ရှင်းလင်းစွာ အသိပေး အပ်ပါသည်။

လက်ရှိအစိုးရအနေဖြင့် ကျန်ရှိသည့် (၂)နှစ်သက်တမ်းတွင် မြစ်ဆုံစီမံကိန်းအပြီးတိုင်ဖျက်သိမ်းရေးကို မဖြစ် မနေ အကောင်အထည်ဖော်ရန် တိုက်တွန်းတောင်းဆိုသည်။

တရုတ်အစိုးရနှင့် ၎င်းတို့အထောက်အပံ့ပေးသောကုမ္ပဏီများသည် မြန်မာနိုင်ငံပြည်သူလူထု၏ ဆန္ဒ၊ သဘောထားများကို မျက်ကွယ်ပြုစော်ကားပြီး စီမံကိန်းများအဓမ္မဖော်ဆောင်ရန်ကြိုးပမ်းနေသည့် လုပ်ရပ် များကိုကန့်ကွက်ရှုံ့ချပြီး မြစ်ဆုံစီမံကိန်းအကောင်အထည်ဖော်မှုကိုအမြန်ဆုံးရပ်တန့်ရန်တောင်းဆိုသည်။

ဒို့မြေကွန်ရက်

(သဘောထားကြေညာချက် ရယူရန် English သို့မဟုတ် ဗမာ)

ကမ္ဘာ့ဘဏ်၏ မြေယာနှင့်ဆင်းရဲနွမ်းပါးမှုကွန်ဖရင့် (၂ဝ၁၉) အပေါ် ဒို့မြေကွန်ရက်၏ သဘောထား

ကမ္ဘာ့ဘဏ်၏ မြေယာနှင့်ဆင်းရဲနွမ်းပါးမှုကွန်ဖရင့်(၂ဝ၁၉)အပေါ် ဒို့မြေကွန်ရက်၏သဘောထား
၂၅ မတ် ၂ဝ၁၉

၂၅-၂၉ နေ့ရက်များအတွက် ကမ္ဘာ့ဘဏ်က ၎င်း၏နှစ်စဉ်ပြုလုပ်မြဲကွန်ဖရင့်ကို “မြေယာနှင့်ဆင်းရဲနွမ်းပါးမှု” ခေါင်းစဉ် ဖြင့် ကျင်းပလျက်ရှိသည်။ အဆိုပါကွန်ဖရင့်ကို ပညာရှင်များစုစည်း၍ မြန်မာနိုင်ငံမှအရေးကိစ္စများအပါအဝင် ကမ္ဘာ့ မြေယာအရေးအတွက် ဆွေးနွေးအဖြေရှာကြမည့် စကြႅံတစ်ခုအဖြစ် ရည်ရွယ်ထားသည်။

ကမ္ဘာ့ဘဏ်အနေနှင့် တစ်ကမ္ဘာလုံးအတိုင်းအတာဖြင့် လူထုများအား မြေယာနှင့်ဆက်နွယ်သည့် ဆင်းရဲနွမ်းပါးမှုမှ လွတ်မြောက်ရေးတွင် ဦးဆောင်နေခြင်းက မှားယွင်းနေသည်၊ ၎င်း၏ရင်းနှီးမြှုပ်နှံမှုများ၊ ဖွဲ့စည်းတည်ဆောက်ပုံ ပြုပြင် ပြောင်းလဲရေးစီမံကိန်းများမှတဆင့် မြေယာနှင့်ဆက်နွယ်သည့် မညီမမျှဖြစ်စေမှုများကြောင့် အကျိုးစီးပွားပဋိပက္ခများ ဖြစ်နေစေကြောင်း ကျွန်ုပ်တို့ဒို့မြေကွန်ရက်က ခိုင်မာစွာယုံကြည်သည် [ဒို့မြေကွန်ရက်သည် မြန်မာနိုင်ငံတဝှမ်းရှိ အရပ်ဘက်အဖွဲ့အစည်းများ၊ လူထုအခြေပြုအဖွဲ့များနှင့်မိတ်ဘက်ပြုစုစည်းထားသည့်တိုင်းရင်းသားပေါင်းစုံပါဝင်သော အမျိုးသားအဆင့်ကွန်ရက်ဖြစ်သည်]။

ဆယ်စုနှစ်ပေါင်းများစွာ ကျေးလက်နေပြည်သူများထံမှ စနစ်ကျကျ၊ ကျယ်ကျယ်ပြန့်ပြန့် မြေသိမ်းမှုများပြုလုပ်ခဲ့သည့် စစ်အစိုးရလက်ထက်မှစတင်ခဲ့သော ဆိုးဝါးသည့်မြေယာပြဿနာများကို မြန်မာနိုင်ငံက ရင်ဆိုင်နေရဆဲဖြစ်သည်။ လက်ရှိ အဲန်အယ်လ်ဒီဦးဆောင်နေသောအစိုးရကလည်း မြေယာအမြတ်ထုတ်မှုသမိုင်းကြောင်းများကိုလျစ်လျူရှုကာ မြေကို ရင်းနှီးမြှုပ်နှံမှုအခွင့်အလမ်းတစ်ရပ်အဖြစ် ယခင်အာဏာရှင်များကဲ့သို့ မညီမျှမှု၊ ပဋိပက္ခနှင့် ဆင်းရဲနွမ်းပါးမှု မီးတောက်များကို ဆက်လက်တောက်လောင်စေသည်။ အဲန်အယ်လ်ဒီဦးဆောင်သောအစိုးရ၏ မြေယာပြုပြင် ပြောင်းလဲရေးများက နိုင်ငံတစ်ဝှမ်းရှိ သန်းပေါင်းများစွာသော လယ်သမားများ၏ မြေယာပိုင်ဆိုင်မှုများကို မလုံမခြုံ ဖြစ်စေပြီး စစ်မှန်သောဖက်ဒရယ်ဒီမိုကရေစီနည်းကျ ပြုပြင်ပြောင်းလဲရေး၊ ရေရှည်တည်တံ့သော ငြိမ်းချမ်းရေးများထံ ဦးတည်ခြင်းမရှိသည်ကို ဝမ်းနည်းစွာတွေ့ရပါသည်။

မကြာသေးမီကပြင်ဆင်လိုက်သော မြေလွတ်မြေလပ်နှင့်မြေရိုင်းများစီမံခန့်ခွဲမှုဥပဒေက မြန်မာနိုင်ငံရှိ မြေဧရိယာဧက ၄၅-သန်းကို “မှတ်ပုံတင်ထားခြင်းမရှိသော” သို့မဟုတ် မြေလွတ်မြေလပ်အဖြစ် သတ်မှတ်ထားပြီး ရင်းနှီးမြှုပ်နှံမှု အတွက် အသုံးပြုနိုင်ရန် ပံ့ပိုးပေးထားသည်။ အဆိုပါမြေဧရိယာ၏ ၈၂-ရာခိုင်နှုန်းက ဗမာမဟုတ်သည့် တိုင်းရင်းသား ဒေသများ (ပြည်နယ်များ)တွင် ရှိနေသည်။ မြန်မာနိုင်ငံတွင် မြေလွတ်မြေလပ်ဟူသော မြေအမျိုးအစားမရှိပါ။ ဒေသ အလိုက်ကျင့်သုံးလျက်ရှိသည့် တောင်သူလယ်သမားများ၏ မြေယာပိုင်ဆိုင်စီမံခန့်ခွဲမှုအလေ့အထမျိုးစုံကို လျစ်လျူရှု ခြင်းအားဖြင့်၊ မြေလွတ်မြေလပ်များအဖြစ် သတ်မှတ်လိုက်ခြင်းအားဖြင့် ဤဥပဒေက အဆိုပါတောင်သူလယ်သမား များစွာကို မြေယာမဲ့ရာဇဝတ်သားများအဖြစ်သတ်မှတ်လိုက်သည်၊ ၎င်းတို့၏ အသက်မွေးဝမ်းကြောင်းမှုများကို ရုတ်သိမ်းလိုက်သည်၊ ၎င်းတို့၏ ယဉ်ကျေးမှုအမွေအနှစ်နှင့် ဖြစ်တည်မှုအမှတ်အသားများကို ခွာချလိုက်သည်။ ဤ အခြေအနေကို တုံ့ပြန်ရန်အတွက် မြန်မာနိုင်ငံတစ်ဝှမ်းရှိ အရပ်ဘက်အဖွဲ့အစည်း ၃၄၆-ဖွဲ့ (http://lioh.org/?p=46) ၊ တိုင်းရင်းသားနိုင်ငံရေးပါတီများ (http://lioh.org/?p=53) နှင့် ကချင်ပြည်နယ်မှ စစ်ဘေးဒဏ်သင့်၍ နေရပ်စွန့်ခွာ ထွက်ပြေးတိမ်းရှောင်နေရသူများက (http://lioh.org/?p=61) မြေလွတ်မြေလပ်နှင့်မြေရိုင်းများစီမံခန့်ခွဲမှုဥပဒေကို ပြန်လည်ရုတ်သိမ်းရန် မြန်မာအစိုးရထံ သဘောထားကြေငြာချက်များ ထုတ်ပြန်ခဲ့ကြသည်။

မြန်မာနိုင်ငံ၏ နိုင်ငံရေး၊ စီးပွားရေးပြုပြင်ပြောင်းလဲမှုများက အဓိပ္ဗါယ်ပြည့်ဝသော၊ ရေရှည်အကျိုးမျှော်ကိုးသော ပြုပြင် ပြောင်းလဲရေးများမဖြစ်သေးမီတွင် နိုင်ငံခြားအစိုးရများနှင့် နိုင်ငံတကာဘဏ္ဍာရေးအဖွဲ့အစည်းများက ပံ့ပိုးထားသော နိုင်ငံခြားကုမ္ဗဏီများက အကျိုးအမြတ်မျှော်ကိုး၍ အလျင်စလိုဝင်ရောက်လာခြင်းက လက်ရှိဖြစ်ပေါ်နေသော နိုင်ငံ တစ်ဝှမ်းရှိ မြေယာပဋိပက္ခများကို ပိုမိုဆိုးဝါးလာစေမည်ဖြစ်သည်။ မြန်မာ့မြေယာအရေးတွင် ကမ္ဘာ့ဘဏ်၏ပါဝင်မှုက မြေသိမ်းမှုများကိုအရှိန်မြှင့်စေနိုင်ပြီး ဒေသခံများကို မြေနှင့်သယံဇာတပိုင်ဆိုင်မှုများ လက်လွတ်ရစေနိုင်သည်။ ထို့အပြင် နေရပ်ရွေ့ပြောင်းစေခြင်းအပါအဝင် လူ့အခွင့်အရေးချိုးဖောက်မှုများနှင့် ပဋိပက္ခများကို ထပ်မံဖြစ်ပေါ်စေနိုင် သည့်အတွက် ဒို့မြေကွန်ရက်မှ ဤသဘောထားကြေငြာချက်ကို ထုတ်ပြန်လိုက်သည်။

ဒို့မြေကွန်ရက် (LIOH)

http://lioh.org, landsinourhands@gmail.com, +95-9785175874

Download (English) (Myanmar)

မြန်မာနိုင်ငံ၏ အမျိုးသားမြေအသုံးချမှုမူဝါဒ – ကျွန်ုပ်တို့၏ တုံ့ပြန်မှုနှင့် အကြံပေးမှုများ

“ မြေအသုံးချမှုမူဝါဒသည် အသေးစားမှ အကြီးစား မြေယာအသုံးချသူများအပါအဝင် တစ်နိုင်ငံလုံးရှိ မြေအသုံချမှုအမျိုးအစားအားလုံးအပေါ် အကျိုးသက်ရောက်မှုများစွာရှိမည်ဖြစ်သည်။ အရေးကြီးသည်မှာ တိုင်းပြည်၏ စီးပွားရေးဖွံ့ဖြိုးမှုအတွက်နှင့် အမျိုးသမီးများ၊ လူငယ်များ၊ ဆင်းရဲနွမ်းပါးသူများ၊ ခုခံနိုင်စွမ်းမရှိသူများနှင့် ဘေးဖယ်ခြင်းခံထားရသူများအပေါ် အထူးအာရုံစိုက်ပြီး လူသားအားလုံးအတွက် မြေယာ၊ သစ်တော၊ ရေလုပ်ငန်း၊ ရေနှင့် အခြားသဘာဝသယံဇာတများကို မျှတစွာ ရရှိသည့် လူမှုတရားမျှတမှု (social justice) အား မြှင့်တင်ရန်အတွက် မြေအသုံးချမှုအား မျှတစွာပြုလုပ်သွားရန်လိုသည်။”

ဇန်နဝါရီလ ၂၉-ရက်၊ ၂ဝ၁၅
ရန်ကုန်၊ မြန်မာ။

၁။ အကျဉ်းချုပ်

၂ဝ၁၄-ခုနှစ်၊ အောက်တိုဘာလ(၁၈)ရက်နေ့တွင် အများပြည်သူရှေ့မှောက် ဖော်ထုတ်ခဲ့သော မြန်မာနိုင်ငံ၏အမျိုးသားမြေအသုံးချမှုမူဝါဒ (NLUP) မူကြမ်းအား ဤအစီရင်ခံစာသည် ပိုင်းခြားစိစစ်ပြီး တုံ့ပြန်ချက်ပေးခြင်းဖြစ်သည်။ ၎င်းသည် Land in Our Hands (LIOH) က စီစဉ်သည့် နိုင်ငံအနှံ့တွင်ပြုလုပ်ခဲ့သော ဆွေးနွေးညှိနှိုင်းမှု အလုပ်ရုံဆွေးနွေးပွဲ(၈) ပွဲအပေါ် အခြေခံထားသည်။ LIOH သည် ရပ်ရွာလူထုအခြေပြုအဖွဲ့အစည်း (CBOs) နှင့် အရပ်ဘက်အဖွဲ့အစည်း (CSOs) ၆ဝ ကျော် ပါဝင်သည့် လယ်သမားကွန်ရက်တစ်ခုဖြစ်ပြီး အသေးစားလယ်သမားများနှင့် ရေလုပ်သားများ၊ အထူးသဖြင့် ကျေးလက်အမျိုးသမီးများနှင့် တိုင်းရင်သားလူမျိုးစုရပ်ရွာလူထုများ၏ မြေအသုံးချပိုင်ခွင့်များအား မြှင့်တင်၊ ကာကွယ်၊ လေးစားပြီး ဖြည့်ဆည်းပေးရန် ရည်စူးထားသည်။ LIOH အနေနှင့် မြန်မာနိုင်ငံသည် လမ်းဆုံလမ်းခွရောက်နေချိန်၌ ဤအလွန်အရေးကြီးသည့် မြေယာမူဝါဒဖော်ထုတ်ရေး လုပ်ငန်းစဉ်တွင် ပါဝင်ဆောင်ရွက်နိုင်ရန် မကြုံဘူးသေးသော အခွင့်အရေးအား ကြိုဆိုလျှက်ရှိသည်။

မြန်မာနိုင်ငံ၏ အသွင်ကူးပြောင်းရေးအစီအစဉ် အောင်မြင်မှုသည် တိုင်းပြည်၏ မြေနှင့်ပတ်သက်သည့် အကျပ်အတည်းအား ဖြေရှင်းနိုင်ခြင်းနှင့် ချိတ်ဆက်လျှက်ရှိပြီး တစ်ချိန်တည်းမှာပင် ဤနိုင်ငံခြားရင်းနှီးမြှုပ်နှံမှုများ တိုးပွားလာသည့် အခင်းအကျင်းအတွင်းတွင် ရပ်ရွာလူထုများ၏ မြေများသိမ်းဆည်းခံရခြင်းအား ကာကွယ်ပေးရန်လိုအပ်သည်။ NLUP သည် ၎င်းကိစ္စရပ်နှစ်ခုစလုံးအား ကိုင်တွယ်ရာတွင် အရေးကြီးသည့်အခန်းကဏ္႑မှပါဝင်ပြီး လက်ရှိမူကြမ်းတွင် အလားအလားကောင်းသည့်အချက်များပါဝင်သည်။ သို့သော် မူဝါဒအကောင်အထည်ဖော်ရေးလုပ်ငန်းစဉ်နှင့် မူဝါဒကိုယ်တိုင်မှာပင် လေးနက်သည့် အားနက်ချက်များကိုလည်း LIOH က တွေ့ရှိဖော်ထုတ်ထားပြီး ဤအစီရင်ခံစာသည် NLUP မူကြမ်းအပေါ် မှန်ကန်ပြီး ပွင့်လင်းသည့် တုံ့ပြန်ချက်တစ်ခုအား ကျွန်ုပ်တို့ဖော်ထုတ်ပေးခြင်းဖြစ်ကာ အတိအကျအကြံပြုချက်များလည်း ပါဝင်သည်။

အဆုံးစွန်အလေးထားရမည့်ကိစ္စမှာ NLUP မူကြမ်းအား ဒီမိုကရက်တစ်မကျသည့် လုပ်ငန်းစဉ်ဖြင့် ရေးဆွဲခြင်းဖြစ်သည်။ မူဝါဒ၏မူကြမ်းအား ၂ဝ၁၃-ခုနှစ်နှောင်းပိုင်းတွင် စတင်ရေးဆွဲခဲ့သော်လည်း၂ဝ၁၄-ခုနှစ်၊ အောက်တိုဘာလမတိုင်မီအထိ ၎င်းအား အများပြည်သူရှေ့မှောက်တွင် ဖော်ပြခြင်းမပြုလုပ်ခဲ့ပါ။ ထိုအချိန်တွင် မြန်မာအစိုးရသည် ပြည်နယ်နှင့်တိုင်းဒေသကြီး(၁၄)ခုတွင် (၁၈)ရက်အတွင်း (၃)နာရီစီပြုလုပ်သည့် ဆွေးနွေးညှိနှိုင်းပွဲ (၁၇)ခုမှသာ တုံ့ပြန်ချက်များကို စုစည်းရန်စီစဉ်ခဲ့သည်။ အချိန်ကာလသည် တိုတောင်းလွန်းသောကြောင့် ဒေသခံရပ်ရွာလူထုများသည် ရှည်လျားပြီး နည်းပညာဆန်ကာ ဘာသာပြန်ထားခြင်းမရှိသည့် စာရွက်စာတမ်းများအား တုံ့ပြန်မှုပေးရန် ကောင်းမွန်စွာပြင်ဆင်နိုင်ခြင်းမရှိပါ။ ထိုအားနည်းသည့် ဆွေးနွေးညှိနှိုင်းမှုလုပ်ငန်းစဉ်သည် LIOH အား ကိုယ်ပိုင်ဆွေးနွေးညှိနှိုင်းပွဲများပြုလုပ်ရန် တွန်းအားပေးပြီး မူဝါဒမူကြမ်းအား ပိုင်းခြားစိစစ်ကာ ကိုယ်ပိုင်တုံ့ပြန်ချက်များ ဖော်ထုတ်စေသည်။ ကျွန်ုပ်တို့အကြံပြုလိုသည်မှာ မြန်မာအစိုးရသည် အများပြည်သူတို့၏မှတ်ချက်အတွက် ပြီးစီးရန်သတ်မှတ်ချိန်အား နောက်ထပ်တိုးပေးစေလိုပြီး NLUP မူကြမ်းအား ဒေသခံသုံးဘာသာစကားများဖြင့် အွန်လိုင်းမှတစ်ဆင့်နှင့် လွတ်လပ်သည့်မီဒီယာနှင့် အစိုးရမီဒီယာနှစ်ခုစလုံးတို့မှတစ်ဆင့် အများပြည်သူသိရှိအောင် ပြုလုပ်ပေးရန်ဖြစ်သည်။

အပြည်အစုံ ဖတ်ရှုရန် — အင်္ဂလိပ်ဘာသာ / မြန်မာဘာသာ

“မြေပိုင်ဆိုင်မှု၊ တည်တံ့ခိုင်မြဲသည့် မြေအသုံးချမှုနှင့် မိသားစုတစ်နိုင်တစ်ပိုင်စိုက်ပျိုးမွေးမြူရေးတို့အား မြှင့်တင်ရန်” ပြည်ထောင်စုသမ္မတမြန်မာနိုင်ငံတော်အားဆော်သြခြင်း

လူတိုင်းအတွက်စားနပ်ရိက္ခာရရှိရေး

အသေးစားလယ်သမားများ၊ ရေလုပ်သားများ၊ သစ်တောထဲတွင်နေထိုင်သူများ၊ ကျေးလက်နေအမျိုးသမီးများ၊ ကျေးလက်နေလူငယ်များနှင့်တိ ုင်းရင်းသားရပ်ရွာလူထုများ၏ မြေယာပိုင်ဆိုင်ခွင့်များအားမြှင့်တင်ပေးရန်၊ ကာကွယ်ပေးရန်၊ လေးစားရန်နှင့် ဖြည့်ဆည်းပေးရန် ပြည်ထောင်စုသမ္မတ မြန်မာနိုင်ငံတော်၏ အစိုးရ၊ လွှတ်တော်နှင့် တရားရေးအဖွဲ့တို့အား ဆော်သြခြင်း။

၂ဝ၁၄-ခုနှစ်၊ အောက်တိုဘာလ (၁၆)ရက်

နိဒါန်း – ကျွနု်ပ်တို့မည်သူဖြစ်သည်နှင့် ဤကြေငြာချက်အားပြုလုပ်ရသည့်အကြောင်းရင်း

  • ကျွနု်ပ်တို့ မြန်မာနိုင်ငံတစ်ဝှမ်းရှိ အသေးစားလယ်သမားများ၊ ရပ်ရွာလူထုအခြေပြုအဖွဲ့အစည်းများနှင့် အခြားအရပ်ဘက်လူ့အဖွဲ့အစည်းများ၏ ကြိုးပမ်းမှုဖြစ်သည့် မြေယာအရေးလှုပ်ရှားသူများကွန်ယက် (Land in our hands) သည် “ကမ္ဘာ့စားနပ်ရိက္ခာနေ့” အား နှုတ်ခွန်းဆက်ရင်းကျင်းပပါသည်။
  • ကျွနု်ပ်တို့သည် ဤနေ့အား ပြည်ထောင်စုအနှံ့ရှိ မိသားစုများနှင့်ရပ်ရွာလူထုများအား စားနပ်ရိက္ခာဖြည့်ဆည်းကျေွးမွေးသည့် ဤနိုင်ငံစားနပ်ရိက္ခာထုတ်လုပ်မှု၏ ကျောရိုးဖြစ်သော အသေးစားလယ်သမားများ၊ ရေလုပ်သားများ၊ သစ်တောထဲတွင်နေထိုင်သူများ၊ ကျေးလက်နေအမျိုးသမီးများ၊ ကျေးလက်နေလူငယ်များနှင့် တိုင်းရင်းသားရပ်ရွာလူထုတို့၏ အရေးကြီးသော အခန်းကဏ္႑အား အသိအမှတ်ပြု၊ သတိတရတန်ဖိုးထားသည့် အထိမ်းအမှတ်အနေဖြင့် ကျင်းပခြင်းဖြစ်ပါသည်။

ပြဿနာ

  • ပြည်ထောင်စုသမ္မတမြန်မာနိုင်ငံတော်တွင် လက်ရှိဒီမိုကရက်တစ် ပြုပြင်ပြောင်းလဲမှုများ ပြုလုပ်နေသော်လည်း ပုဂ္ဂလိက သို့မဟုတ် အများပြည်သူဆိုင်ရာ အဖွဲ့အစည်းဆောင်ရွက်သူများ၏ စားနပ်ရိက္ခာလုံခြုံမှုအမည်ခံကာ မြေယာပိုင်ဆိုင်မှု လွဲှပြောင်းခြင်းများ သို့မဟုတ် မြေသိမ်းဆည်းမှုများသည် ကြီးမားသည့်အတိုင်းအတာဖြင့် ဖြစ်ပွားမှုများ ပိုမိုမြင့်တက်လျှက်ရှိပါသည်။ ထိုသို့ မြေယာပိုင်ဆိုင်မှု၊ လွဲှပြောင်းမှုအများစုမှာ မြေလွတ်မြေရိုင်း သို့မဟုတ် ပလပ်မြေမြေများအနေနှင့် ပြုလုပ်သော်လည်း အဖြစ်အပျက်အများစုတွင် ရပ်ရွာလူထုများ၏ မြေယာပိုင်ဆိုင်မှု အသုံးပြုမှုအပေါ် ထိခိုက်မှုများတွေ့ရှိရသည်။ အထူးသဖြင့် ကျွန်ုပ်တို့-အသေးစားလယ်သမားများ၊ ရေလုပ်သားများ၊ ကျေးလက်နေအမျိုးသမီးများနှင့် တိုင်းရင်းသားရပ်ရွာလူထုများသည် နေရာရွှေ့ပြောင်းခံရခြင်းနှင့် အတင်းအဓမ္မဖယ်ရှားခံရခြင်း သို့မဟုတ် ကျွနု်ပ်တို့၏ စားနပ်ရိက္ခာထုတ်လုပ်ခြင်းနှင့် ရပ်တည်ရှင်သန်ခြင်းအတွက် အရေးကြီးဆုံးအရင်းအမြစ်များဖြစ်သည့် ကျွန်ုပ်တို့၏ မြေယာနှင့် ရေအရင်းအမြစ်တို့ဆုံးရံှုးခြင်းများ ဖြစ်ပေါ်လျှက်ရှိသည်။ ရလဒ်မှာ အလုပ်အကိုင်များ ဆုံးရံှုးခြင်း၊ ပတ်ဝန်းကျင်ဆိုင်ရာ အပျက်သဘောဆောင်သည့် အကျိုးသက်ရောက်မှုများနှင့် လူမှုရေးဆိုင်ရာ မငြိမ်သက်မှုများ ကြီးထွားလာသည့်အပြင် မိမိကိုယ်တိုင်နှင့် မိမိရပ်ရွာလူထုများ၊ မိမိပြည်သူများ၏ စားနပ်ရိက္ခာထုတ်လုပ်နိုင်ခြင်းများ ဆုံးရံှုးစေသည်။
  • ထိန်းချုပ်မှုမရှိခြင်း သို့မဟုတ် အဆိုး်ဖြစ်စေသည့်ထိန်းချုပ်မှုမျိုးနှင့် အဖွဲ့အစည်းဆိုင်ရာမူဘောင်များသည် ကျွန်ုပ်တို့၏မြေယာပိုင်ဆိုင်မှုအားကာကွယ်ခြင်း၊ လေးစားခြင်းနှင့် ဖြည့်ဆည်းပေးခြင်းတို့အပေါ် နိုင်ငံတော်၏ ပံ့ပိုးမှု လစ်ဟင်းလာစေသည့်အပြင် တိုင်းပြည်နှင့်၎င်း၏ပြည်သူများအားကျေွးမွေးနေသည့် အရေးကြီးသောအခန်းကဏ္႑တွင် ပါဝင်သည့် အသေးစားစားနပ်ရိက္ခာစိုက်ပျိုးမှုများနှင့် ရေလုပ်ငန်းတို့အား ထောက်ပံ့ပေးခြင်းမရှိပါ။

ကျွနု်ပ်တို့၏အဓိကဆော်သြချက်နှင့်ခိုင်မာသည့်တောင်းဆိုချက်များ

တိုင်းပြည်တွင် ခိုင်မြဲသောငြိမ်းချမ်းရေးနှင့် အမှန်တကယ်မျှတပြီး တည်တံ့သည့် ဖွံ့ဖြိုးရေးရရှိရန်နှင့် လက်ရှိဒီမိုကရက်တစ်ပြုပြင်ပြောင်းလဲမှုများနှင့်အညီ ပြုလုပ်ရာတွင် မြေယာအရေးလှုပ်ရှားသူများကွန်ယက် (Land in our hands) မှ ပြည်ထောင်စုသမ္မတ မြန်မာနိုင်ငံအစိုးရ၊ လွှတ်တော်နှင့်တရားရေးအဖွဲ့တို့အား အသေးစားလယ်သမားများနှင့် ရေလုပ်သားများ အထူးသဖြင့် ကျေးလက်နေအမျိုးသမီးများနှင့် တိုင်းရင်းသားရပ်ရွာလူထုများ၏ မြေပိုင်ဆိုင်ခွင့်များအား မြှင့်တင်၊ ကာကွယ်၊ လေးစားပြီး
ဖြည့်ဆည်းပေးရန် တောင်းဆိုသည်။ အထူးသဖြင့် ကျွန်ုပ်တို့သည် ပြည်ထောင်စုနိုင်ငံတော်အား –

၁။ အသေးစားလယ်သမားများ၊ ရေလုပ်သားများ၊ ကျေးလက်နေအမျိုးသမီးများနှင့် တိုင်းရင်းသားရပ်ရွာလူထုများ၏ မြေရပိုင်ခွင့်များအား မြှင့်တင်ပေးခြင်း၊ ကာကွယ်ပေးခြင်း၊ လေးစားခြင်းနှင့် ဖြည့်ဆည်းပေးခြင်းတို့အပေါ် အလေးထားသော အမျိုးသားမြေမူဝါဒနှင့် ဥပဒေအား ပြုပြင်ပြောင်းလဲရန်၊

၂။ မြေမူဝါဒနှင့် ဥပဒေပြုပြင်ပြောင်းလဲရာတွင် အသေးစားလယ်သမားများ၊ရေလုပ်သားများ၊ ကျေးလက်နေအမျိုးသမီးများနှင့် တိုင်းရင်းသားရပ်ရွာလူထုများ၏ ကိုယ်စားလှယ်အားလုံးသည် ထိရောက်စွာပါဝင်နိုင်ရန်အတွက် နေရာဖန်တီးပေးပြီး ထောက်ပံ့ပေးရန်၊

၃။ တိုင်းရင်းသားပြည်သူများနှင့် ရိုးရာအစဉ်အလာအရမြေပိုင်ဆိုင်မှုစနစ်များ အသုံးပြုလျှက်ရှိသော အခြားရပ်ရွာလူထုများ၏ မြေပိုင်ဆိုင်မှုစနစ်များအား အသိအမှတ်ပြု၊ ကာကွယ်၊ လေးစားပြီး ဖြည့်ဆည်းပေးရန်အတွက် လိုအပ်ပြီး သင့်တော်သည့်မူဝါဒ၊ တရားဝင်၊ အဖွဲ့အစည်းဆိုင်ရာနှင့် ဘတ်ဂျက်နှင့်အညီ မူဘောင်များကျင့်သုံးရန်၊

၄။ အမျိုးသမီးများ၏ မြေယာနှင့်အစားအစာရပိုင်ခွင့်များအား ပြုပြင်ပြောင်းလဲထားသည့် မြေအုပ်ချုပ်မှုဆိုင်ရာမူဘောင်အတွင်းရရှိခြင်း သေချာအောင်ပြုလုပ်သွားရန်၊

၅။ တိုင်းရင်းသားပြည်သူများနှင့် ရိုးရာအစဉ်အလာအရ မြေပိုင််ဆိုင်မှုစနစ်များရှိသည့် အခြားရပ်ရွာလူထုများ၊ ထိုစိုက်ပျိုးမြေ၊ ရေလုပ်ငန်းများနှင့် သစ်တောများတွင်နေထိုင်သူများအတွက် မြေ၊ ရေလုပ်ငန်းများနှင့် သစ်တောများသည် လူမှုရေး၊ ယဉ်ကျေးမှု၊ ဘာသာရေး၊ စီးပွားရေး၊ ပတ်ဝန်းကျင်ဆိုင်ရာနှင့် နိုင်ငံရေးအဓိပ္ပာယ်များနှင့် တန်ဖိုးများရှိကြသည်ကို အသိအမှတ်ပြုရန်၊

၆။ အသေးစားလယ်သမားများ၊ ရေလုပ်သားများ၊ ကျေးလက်နေအမျိုးသမီးများနှင့် တိုင်းရင်းသားရပ်ရွာလူထုများသည် ၎င်းတို့၏ရပ်ရွာလူထုတွင်ရှိသော မြေ၊ မြေဆီလွှာ၊ ရေလုပ်ငန်းများ၊ ရေနှင့်သစ်တောများအပေါ် ကိုယ်ပိုင်အုပ်ချုပ်ခွင့်နှင့်ပတ်သက်ပြီး မြေမူဝါဒနှင့် ဥပဒေတွင် မြှင့်တင်၊ ကာကွယ်၊ လေးစားပြီး ဖြည့်ဆည်းပေးရန်၊

၇။လယ်သမားများ၊ ရပ်ရွာလူထုအဖွဲ့ဝင်များနှင့် ကဏ္႑အသီးသီး၏ ကိုယ်စားလှယ်အဖွဲ့ဝင်များအားလုံးတို့အား တစ်နိုင်ငံလုံးရှိ သဘာဝသယံဇာတများနှင့် မြေယာအခြေခံသော အငြင်းပွားမှုများအား ပါဝင်ဖြေရှင်းနိုင်ခြင်းကို ခွင့်ပြုသည့် မှန်ကန်သော တရားဝင် မြေယာအငြင်းပွားမှုဖြေရှင်းရေးယန္တရားနှင့် စနစ်အား ဖန်တီးရန်၊

၈။ အသေးစား အစားအစာထုတ်လုပ်သူများနှင့် ဒေသခံမိသားစု တစ်နိုင်တစ်ပိုင်စိုက်ပျိုးမွေးမြူရေး လုပ်ကိုင်နေသော ရပ်ရွာလူထုများအား အကာအကွယ်ပေးထားခြင်း သေချာစေရန် သိရှိနားလည်မှုဖြင့် ကြိုတင်၍ လွတ်လပ်စွာပေးသော သဘောတူခွင့်ပြုချက် (FPIC) နှင့် ညှိနှိုင်းဆွေးနွေးမှုဆိုင်ရာ စံချိန်စံနှုန်းများအား အာမခံပေးရန်၊

၉။ အသေးစားလယ်သမားများ၊ ရေလုပ်သားများ၊ ကျေးလက်နေအမျိုးသမီးများနှင့် တိုင်းရင်းသားရပ်ရွာလူထုများ၏ မြေ၊ ရေနှင့် သစ်တောရပိုင်ခွင့်များအား နိုင်ငံတော်၏မြေမူဝါဒနှင့် ဥပဒေတွင် သင့်တော်သလို မြှင့်တင်၊ ကာကွယ်၊ လေးစားပြီး ဖြည့်ဆည်းပေးခြင်းများမပြုလုပ်မချင်း တိုင်းရင်းသားနယ်မြေများရှိ လက်ရှိ အကြီးစားဖွံ့ဖြိုးရေးစီမံကိန်းများ (လမ်းများနှင့် အကြီးစား ရေအားလျှပ်စစ်ရေကာတာများ အပါအဝင်) နှင့် မြေယာလွဲပြောင်းခြင်းမျိုးစုံ (သတ္တုတွင်းတူးဖော်ခြင်း၊ ရေနံထုတ်လုပ်ခြင်း၊ သစ်ထုတ်လုပ်ခြင်းနှင့် ကန်ထရိုက်လယ်ယာစိုက်ပျိုးရေးအပါအဝင် စိုက်ပျိုးခြင်းများကဲ့သို့သော) တို့အား ပြုလုပ်နေခြင်းမှ တရားဝင်ဆိုင်းငံ့ထားရန်၊

၁ဝ။ နောက်ဆုံအနေဖြင့် စစ်မှန်သည့်ငြိမ်းချမ်းရေးနှင့် နိုင်ငံရေးအဖြေများရရှိရေးဆီသို့ ဦးတည်ဆောင်ရွက်ခြင်းတွင် ကျွန်ုပ်တို့၏မျှော်လင့်ချက်များနှင့် အသံများအား လက်ခံပြီး နားထောင်ပေးရန် စသည်တို့အားတောင်းဆိုသည်။

အချုပ်အနေဖြင့် မြေယာအရေးလှုပ်ရှားသူများကွန်ယက် (Land in our hands) မှ ယုံကြည်သည်မှာ အထက်ဖော်ပြချက်အားလုံးအား အလေးအနက်ထား၍ သင့်တော်သလို ကိုင်တွယ်ခြင်းများ မပြုလုပ်ပါက မြန်မာနိုင်ငံရှိပြည်သူအားလုံးတို့အတွက် ခိုင်မာသည့် ငြိမ်းချမ်းရေးနှင့် တည်တံ့ခိုင်မြဲသည့် ဖွံ့ဖြိုးရေးကို ရှာတွေ့မည်မဟုတ်ပါ။ ကမ္ဘာစားနပ်ရိက္ခာနေ့သည် အသေးစားလယ်သမားများ၊ ရေလုပ်သားများ၊ ကျေးလက်နေအမျိုးသမီးများ၊ ကျေးလက်နေလူငယ်များနှင့် တိုင်းရင်းသားရပ်ရွာလူထုများသည် မြန်မာနိုင်ငံ၏ စားနပ်ရိက္ခာလုံခြုံရေးအား မည်မျှဖြည့်ဆည်းပေးလျှက်ရှိသည်ကို စဉ်းစားသုံးသပ်ရန်ကောင်းသောအချိန် ဖြစ်ရုံတင်မက ၎င်းတို့သည် ပိုမိုကောင်းမွန်ပြီး ပိုမိုတရားမျှတကာ ငြိမ်းချမ်းသည့်လူ့အဖွဲ့အစည်းဆီသို့ အပြုသဘောအားဖြင့် ကူးပြောင်းရန် အားလုံးအတူတကွ ပါဝင်ဆောင်ရွက်ခဲ့သည်ကို လေ့လာသုံးသပ်ရန် အလွန်ကောင်းသောအချိန်လည်းဖြစ်ကြောင်း အလေးထားတင်ပြအပ်ပါသည်။

ဆက်သွယ်ရန်
မောင်စည်သူ-၀၉၄၀၃၇၀၆၀၅၂
စောအဲလက်စ်-၀၉၂၅၄၂၀၇၈၄၂

ကြေညာချက်ကိုရယူရန် (အင်္ဂလိပ် မြန်မာ)